Victoria Immanuel

OSHAKATI – Aalongi ayehe moshilongo oya tyapula esiku lyawo ohela.

Esiku ndyoka oha li dhimbulukiwa momasiku 5 Oktoba omumvo kehe, noha li tyapulwa moshilongo ashihe.

Esiku ndyoka olya kala ha li dhimbulukiwa aluhe oku za momumvo 1994, sha ikolela komushangwa gwomumvo gwa zi ko gwehangano Unesco.

Oya li ya shanga kutya, esiku ndika oha li tyapulwa kaalongi ayehe moshilongo oku ya pa ompito okusimaneka esiku lyawo.

Uuministeli welongo owa li wa tseyithile oosikola dhi fudhe po mesiku lyawo.

“Esiku ndyoka olya li lya nuninwa aalongi opamwe naalongwa yawo, opo yuuve esimano lyesiku,” uuministeli wa fatulula ngaaka.

Shoka okwa li sha ningwa nelalakano lyokukongela aalongi omayambidhidho nokushilipaleka kutya aalongi oya gwanitha po oompumbwe dhomapipi tage ya.

Esiku ndika olya ndhindhilikwa wo ha li tyapulwa nokundhindhilikwa ongesiku lyaalongi uuyuni awuhe, onkene olyi na okusimanekwa.

Omulongisikola posikola Ondelekelema Primary Secilia Amupolo okwa ti okwa li a tseyithila aalongwa ye kutya otaya ihulu ko Etitano kosikola taya galukile ko ashike Etiyali. “Uuministeli owa tula po okafudho kesiku opo ku gandjwe ompito kaalongi ya tyapule esiku lyawo nombili, nohole osho wo moshili nomomukalo omwaanawa,” ta ti ngaaka.

Okwa popi ta ti, aalongi oye na okusimanekwa nokupandulwa sho ya kala yi itula mo okugwanitha po iilonga yawo.

“Otu uvite uuntsa oshoka esiku ndika ota li ulike nkene twa simanekwa ngaashi ngaa aanilonga yalwe haya simanekwa,” ta popi ngaaka.

Omulongisikola gumwe natango posikola Ehenye okwa ti aalongisikola oya simana monkalamwenyo.

“Aalongi oye lile po okugandja uunongo wawo kaalongwa, ihe ohashi pula oshindji okuuvitha ko omulongwa a kale a taamba ko shoka ta longwa, osho wo okukwashilipaleka kutya oto gwanitha po iilonga yoye,” ta popi ngaaka.

Ta fatulula ta ti, elongo epatululo lyonkalamwenyo lyomuntu onkene olyasimana.

“Onkalamwenyo yomuntu ohayi longekidhwa kelongo,” ta popi ngaaka.

Ta gwedha po ta ti, aalongi oye na okusimanekwa oshoka oyo haya xwaxwameke onkalamwenyo yomuntu monakuyiwa.

Ta gandja oshiholelwa ta ti, aantu mboka inaaya mona elongo, oye li momapandaanda omanga mboka ya mona elongo lyi ihwa po, ye li moombelewa noye na iilonga iiwanawa.