Omuthigululwakalo gwoshiwana shaayelele okwa li gwa dhimbulukiwa mo Tsumkwe mehuliloshiwike ndika.

Elelo lyopamuthigululwakalo moshikandjohogololo shaTsumkwe moshitopolwa shOtjozondjupa olya li lya dhana oshituthi shopamuthigululwakalo gwayelele mbono ya tseyika nawa onga a San. Ngoloneya gwoshitopolwa shOtjozondjupa John //Khamuseb ngono kwa li gumwe gomaapopi ya simana okwa tseyitha kutya oshituthi shika osha li sha ningwa mokugandja esimaneko nokudhimbuluka omalenga osho wo aakwanilwa yopomuthigululwakalo ngoka ga tetekele nale .

Yamwe po yomaakwanilwa ongaashi elenga enene Tsamkxao “Oma Bobo” lyelelo lya Ju/’hoan , nosho wo omukwanilwa John Arnold, Chief Dawid //Khamuxab . Pethimbo ta popitha aakwashituthi, //Khamuseb okwa ti oshituthi shika osha simana mondjokonona yaayelele , oshoka otashi longo aakwashiwana nkene yena okukaleka po omuthigululwakalo gwawo monakuyiwa.

Ta tumbula kutya nonando ondjokonona yaayelele oyindji inayi shangwa momambo, oyendji oya teke mo sha muutewo, omahokololo nelongitho lyelaka pethimbo lyoshituthi shika.

//Khamuseb okwa li wo a kugilile aakwateli komeho melongekidho lyoshituthi shika opo shi kale hashi dhanwa kehe konvula opo oshiwana shika shaayelele shi vule okumona ompito nokugongala pehala limwe yo aanyasha ya vule okuteka mo sha maakuluntu. Moshipopiwa shomupevipresidente Lucia Witbooi okwa li wo a kugilile opo omuthigululwakalo , ondjokonona dhaayelele opo dhi shangwe nokunyanyangidhwa dho dhi wape okutaambathanwa komapipi gokomongula. Ta indile wo oshikandjohogololo niikandjo yopapangelo opo yi yambidhidhe aakwashiwana mbaka ya vule okulanditha iinyangadhalwa yawo pondje yoshilongo.