Manga Ovanaimibia keembinga tave li longekidile omalweendo va ka tyapule omatango manene novakwanedimo vavo, epangelo nalo ole li longekida okufya oshisho kutya meendjila ola tula mo oufano mopate okutala ovashingi.

Edi oda kolekwa kuMinista woyeendifo noilonga Veikko Nekundi kutya paife meepate omwa tulwa oufano ovo velile po okutala ovashingi ava hava kala tava shingilile ile tava tauluka eemhango dopate.

“Oufano ava ova longwa momukalo ou kutya,ngeenge ke ku kwata toshingilile, oto dulu okuulika kutya owa li to shingile ponhapo ili pi, okutala ngeenge onhapo oyo ngaho ya ufwa okushingwa,” Minista ta holola ngaho.

Nekundi edi okwe di popya pefimbo ali ta yandje ouyelele una sha nomoshikodo shaye shouministeli komutumba wopashiwana oshivike sha dja ko.

Okwa twikila kutya paife, ope na nale oufano vamwe va tulwa pokati ko Arandis no Swakopmund osho yo pokati Arandis no Usakos ovo hava i fiyo oshinano sheekilomita 40.

Minista okwa yelifa kutya keshe apa va dilaadilila okukala va tula oufano ava, ngeno ova hala pu kale pa pwa etameko la Novemba.

“Otwa teelela ashike omukanda wetu wokutupa eefeloma okudilila kehangano lo Communication Regulatory of Namibia (CRAN) olo li na oshinakuwanifa shoku andjakanifa oinima aishe ya nyika ouyelele omo mwa kwatelwa nomauyelele opaungoba,” ta ti.

Nekundi okwa twikila kutya elalakano loufano ava oku ninipaleka oiponga yomeendjila, unene ngaashi oitufi yomatango manene tai fiki osho yo okufya oshisho kutya ovashingi voihauto otava shikula ngaho eemhango domopate.

“Manga ouminsteli weli pyakidila nokufya oshisho kutya eepate oda tulwa oufano, natango otwe li pyakidila noku lundulula eenomola doihauto,” ta ti.

Nekundi okwa yelifa kutya eenomola edi dipe ota di ka yandja eyooloko la ukilila pokati koihauto yepangelo, eetaxi, eetuwa odo di na eenomola ile omadina opaumwene onga omadidiliko, naadi da kala nale di na omadililiko a shunga.

Okwa ti yo eenomola edi dipe ota di ka kala di na eekode dipe, odo tadi ka kwafa opolifi okulonga noupu unene ngeenge pe na oilonga yoikulumuna tai longwa.