Elelo loshitukulwa shaHangwena ola landa oihauto iheyali yongushu yeemiliona N$4,7 okunghonopaleka omayakulo moshitukulwa.

Oihauto ei oya yandjwa momake omunambelewakulunhu melelo loshitukulwa shaHangwena Fillipus Shilongo.

Oyeendifo opo tai ka topolelwa oitukandjohoololo ya yooloka moshitukulwa opo ookansela va dule okukala tava longo oilonga yavo va manguluka nokukwafela meembelewa osho yo moikandjohoololo yavo.

Eetuwa hetatu oda nhuninwa yo okukwafa ovakwashiwana meendelelo ngeenge pe na omhumbwe momidingonoko.

Omunambelewakulunhu mombelewa yoshitukulwa shaHangwena Fillipus Shilongo okwa ti oshitukulwa osha kala momhumbwe yoyeendifo oule wefimbo.

Ta ti omhumbwe yoyeendifo oya kala hai yi oilonga yavo moshipala.

“Oyeendifo ei otwa teelela i kale tai kwafele moshitukulwa shetu notu wete kutya otashi ketu ningila shipu okunyamukula komakemo ovakwashiwana vetu pefimbo,” Shilongo ta holola ngaho.

Okwa ti okukala vehe na oyeendifo oyo tai dulu okuvukula efululu moshitukulwa osha kala einda lakula moilonga yavo. Shilongo okwa holola yo kutya ova kala ve na oupyakadi woyeendifo unene pefimbo lomeva.

Omunambelewakulunhu okwa ti pefimbo lomeva ove na eenhele oko va kala ihava dulu okufika molwaashi oyeendifo oyo ve na itai dulu okuenda momeva.

Okwa ti vali ova kala vena oyeendifo ishona oyo ihai dulu okuenda mefululu nova kala ihava dulu okufika keenhele oko.

Okwa weda po kutya oyeedifo ei oya teelelwa ika kwafele ovanambelewa okukala tava i koikandjohoololo nokomidingonoko va ka yandje omakwafo nokunyamukula komakemo ovakwashiwana.

Okwa weda po ta ti oyeendifo oya fimana meembelewa davo molwaashi ohai kwafele ovaleli opo va fike kovakwashiwana .

Shilongo okwa hololela kundana kutya nonande va mona oyeendifo ei iheyali, natango inai va wanena molwaashi oshitukulwa osha kula, shi na oikandjohoololo ihapu osho yo oshiwana ofulundudu.

“Oyeendifo ei otwa hala ika longwifwe momauwa wovakwashiwana okukala hatu va nyamukula pefimbo nokuva pa osho va pumbwa,” Shilongo ta holola.

Shilongo okwa kunghilila ovashingi ovo taveke li neekelelwa oihauto ei opo vei shinge nawa, vei kwatele po ndele ha ku shinga eenhapo da pitilila opo oyeendifo i dule okukala po.