Epangelo okupitila mouministeli wouhaku nonghalonawa ola tunga oICU younona hano oPaediatric Intensive Care Unit keemiliona N$28. Osaala oya tungwa moshipangelo shepangelo shakula shoWindhoek Central. Oya patululwa pambelewa Omaandaxa kuMinista wouhaku nonghalonawa Dr Esperance Luvindao.

OPaediatric Intensive Care Unit (PICU) oilile po okutambula okuidilila ounona ovo have li hange ve li monghalo ya divilika, itai nuwa meva nova pumbwa ekwafo lopaunamiti lopombada ngaashi oku ya komipepo ile komashina amwe a wedwa po.

Ouministeli owa holola kutya oshipangelo osha kala ashike shi na eembete hamano odo hadi kwafele ounona ngeenge veli meenghalo ita di nuwa omeva.

Ouministeli owa ti ngeenge osaala oya hada ounona okwa li hava twalwa keesaala dimwe deli kalekelwa nonande hako ve na okukala tava hakulilwa omolwa ashike omhumbwe.

Osaala ei ipe paife oya tungwa momukalo weli kalekelwa, i na omashina onomewina okuxupifa eemwenyo dounona ava, osho yo okuva vatela momikalo da yooloka.

Omashina amwe a fimana e li mosaala omu ongaashi, omashina okufuda okuyakula ounona ava itava dulu okufuda kuvo vene, omashina okutala omutima nokukwafa ounona ngeenge va kwatwa koudu womutima nomashina amwe a wedwa po.

Luvindao okwa holola kutya oilonga yosaala ei otai ulike elitule mo lepangelo mokuyandja omakwafo koshiwana osho yo okuholola kutya epangelo oli na oshiwana alushe komutima.

“Epangelo ola fya oshisho kutya ola landa omashina onomenawina oo ena oshinakuwanifa shoku pepa omhepo osho yo omipepo dimwe yo vali deli kalekelwa odo tadi ka yambida ounona unene ngeenge veli hange vena omapunga itaa longo ile omifudo da pata nakeshe tuu osho hashi pangwa mosaala omu,” Minista ta holola ngaho.

Livindao okwa twikila kutya oveshi shi noveudite kutya oshiwana otashi kondjo nokukwenena, sha hala omakwafo opauhaku e li pondodo ili nawa.

Ta ti ouministeli otau fi oshisho kutya omakemo oshiwana ngeenge tashi ya kouhaku okwa wanifwa po alushe.

Minista okwa holola kutya osaala ei kai shi ashike omatungo a fikama ngahenya ndele otai ka xupifa eemwenyo dounona vahapu moNamibia. Osaala ei itai ka kwafa ashike ounona ava have li hange ve na ounghundi moshilandopangelo, ndele otai ka kwafa keshe okaana take ke li hanga ka tuminwa ko Windhoek, keli monghalo oyo ya pumbwa ekwafo okudja kosaala ei.

Omafyo eehanana okwa fika po 24 mounona 1 000 va dalwa omanga ouministeli tau lalakanene okushunifa omwaalu oo pedu nomafyo ashike e li 10 mounona 1 000 va dalwa mo2030.

Osaala ipe otai ka kwafa okushunifa omafyo oupelema, ounona va dalwa ve na omaunghundi a yooloka, ovo va pumbwa ekwafo lokufuda navakwao vahapu.

Minista okwa indila ovapangi va longife nawa osaala ei, okukwata nawa omashina opo a kwafe nokukalela oshipangelo opo a dule okuxulifa eemwenyo dounona omayovi moNamibia.