Tsandi- Ovanafaalama moshitukulwa shaMusati ova pandula epangelo eshi noneudo la twikila okulanda oilya osho yo omapungu kuvo.

Ovanafaalama ova ti oilonga yomupondo tai ningwa kepangelo mokulanda oilikolomwa yavo, oye va kufa koshi.

Epangelo noneudo melongelokujmwe nehangano lo AMTA ola yandja eemiliona N$40 opo di dule okulanda oilya osho yo omapungu movanafaalma oshilongo ashishe.

Vistorina Kalifhe omunamido 40, oo eli omukalimo womoshitukulwa shaMusati okwa ti paife okwa ninga eedula da fika punhee ta landifa oilya kehangano lo AMTA.

Kalifhe okwa twikila kutya okwa fininikwa a kale ha landifa po oilya yaye imwe koluhepo. Okwa ti oha landifa opo a mone okafilinga koku li kwafa shaashi oha longo omahapu mahapu keshe omudo.

Okwa twikila kutya nghee a dalelwe a mone oilonga ile a kutwa poilonga yonhumba, ashike ounona vaye ihava nangele ondjala molwa eenghono daye.

“Oimaliwa e i hai mono mokulandifa oitadi shili, yo ohai kwafele nge hanga konyala meenhumbwe dange adishe nohai futu eefikola neemhumbwe dounona vange adishe,” ta ti. Okwa twikila kutya oha longo omahangu noudiinini ngeenge shaashi omahangu oo ashike hae mu kufa koshi.

Erkki Shitwomunhu oo naye ali eya okulandifa oilya okwa ti mokulandifa omahangu okwa kala mo eedula da fika punhe da uka punhano paife.

Okwa ti momukokomoko weedula adishe odo a kala ta landifa omahangu aye, ongeshefa oya kala tai mu endele lela nawa.

“Ame ngaashi moshimaliwa shange omo ha ndi pululifa, omo yo handi mono oshimaliwa shokuhelelifa nokulanda eembuto,” ta ti Shitwomunhu okwa twikila kutya ngaashi eedula natu da ka pita, oda kala tadi mu endele nawa lela shaashi okwa li ku na omuloka muwa neenghono.

Omunafaalama ou okwa yelifa kutya AMTA oheva pe valye lela, naashi shiwa oshe shi kutya oilandifomwa yavo ko AMTA ovo vene have i longo onghee ohava kala ve na okondolola ya wana nawa ngeenge tave i longo opo va fye oshisho kutya oya temu na lela oidjemo iwa. Ovanafaalama ova twa vakwao ava veli pyakidila nokulonga omahangu va kale tave shi ningi nondjungu opo va dule okulimonena mo oyuuyemo.

Ova twa yo vakwao omukumo opo va landife oikunomwa yavo kuAMTA okudenga po oluhepo. Ova ti AMTA oha yandje sha kola mondjato.

-taimihaihambo2000@gmail.com