Hambeleleni Daniel 

ONGWEDIVA-Opolifi moshitukulwa shaShana oya tula omukokele weedula 66, omukwashiwana wa Angola mokakuma Etitano sha landula eshi a hangwa nomaliko taa feekelwa a vakwa. Omukulupe womOngwediva molukanda New Reception okwa hangwa a ninga eumbo laye ombaanga yoinima ya vakwa oyo taku feekelwa kutya oya vakwa nokunyekwa oshiwana.

Meumbo omu omwa hangika oinima ondumba ngaashi: eengodi, laptops, eeTV,eehaasa dokuteleka, omafiya okolusheno, omakaya oYes oo haadi poushindalongo naikwao ihapu.

Oinima oya hangika meumbo laye kopolifi pefipo ya li moilonga tai ningi opatolola hano operation, tai ende poivelo, kombada yoipeleki nakeshe pamwe.

Opatolola ei okwa li yakwatelwa komesho kOmukulunhu wopolifi moshitukulwa shaShana Commisssioner Andreas Shilelo.

Omukulunhu wopolifi nosheendo shaye, okwa li ve li vakela moshiwana Etitano, tava kondeke omaumbo nelalakano lokuxwepopaleka oimbuluma moshitukulwa shaShana.

Otaku hokololwa opolifi ya ya meumbo lomukokele ou taku hokololwa omukwashiwana wa Angola. Omukokele oye tuu ou, okwa hangika nomaufemba ovanhu mahapu ngaashi eedjapo domadalo, oumutwe voshilongo ,oukalata vokoshipangelo,oukalata veembanga neepin dovanhu osho yo eepassport.

Opolifi oya ti omakonakono otaa twikile okutala kutya oinima ei ohai vakwa ngahelipi unene tuu oinima yepangelo oyo ya hangika mo.

Opolifi natango oya ya noimaliwa oyo ya hangika mondingosho oyo ina i shangifwa. Osho yo omakende omaludi a yooloka. Shilelo okwa kunghilila ovanhu opo veli kaleke kokuke nokuninga eekamba inadi shangifwa molwaashi eshi otashi xumifa komesho oulunga.

Natango okwa lombwela ovakwashiwana kutya ngeenge momidingonoko davo natango omu na ovanhu hava ningi oinima yolundi eli vevashi nave va lopote kopolifi opo ku shunifwe oulunga pedu.