Mexuliloshivike, ongudulwiimbo yovanyasha yedina Hoolola Omwenyo Choir, Eenhana Anglican okwa li i na oxungi omo va li vena omakondjifafano okuimba.

Eengudulwiimbo da yooloka okwa li da holoka momwaalu muhapu okuulika ounongo wavo wokuimba.

Omukwateli komesho nokuli omuunganeki woshivilo shoxungi eshi Neisho Hamunyela okwa ti elalakano loxungi okulonga osho yo okuhafela pamwe novanyasha vakwao.

Okwa ti koxungi okwa li kuna oinyangadalwa ya yooloka ngaashi otundimbiibeli, omakondjifafano okuimba, omakondjifafano ekopi.

Okwa weda po ta ti omupopi a liko a fimana oKansela woshikandjohoololo shaKongo Efraim Shipindo.

Shipindo okwa kumaida ovanyasha opo va waimine vakwao meengudulwiimbo molwaashi eshi otashi kwafele omunhu a kale e na elandulafano.

“Meengudulwiimbo oha mu li hongwa oinima ihapu ya fimana ngaashi nghene omunyasha e na okuliumbata, kombinga yotundimbiibeli nosho tuu,” ta ti.

Okwa ti osha finama ngeenge omunhu ta ulike ounongo waye wokuimba shaashi otashi dulu okumu twalwa kondje yoshilongo a ka kufe ombinga momakondjifafano okuimba.

Lwopokati opo, Hamunyela okwa ti oxungu ei oya fimana shaashi otai ka eta ovanyasha va hangane nokulongifa ounongo wavo wokuimba.

“Omunhu keshe ou e na ehalo okwa li a holoka nelalakano lokutokelwa pamwe nafya,” ta ti.

Okwa yelifa ta ti koxungi okwa li kuna oipopiwa ya fimana tai yandje ehongo nomatumwalaka kovanyasha.

“Otwa topokelwa hatu imbi omaimbilo taa hekeleke ovanhu osho yo okuetela omunhu omhepo iwa,” ta ti.

Okwa ti omunhu keshe okwa manguluka okukala a waimina ongudu yavo ndele ta ningi oshilyo. –fhamalwa@nepc.com.na