Ombelewa yaNgoloneya waShana Hofini Iipinge melongelo kumwe nelelo lodoolopa yaShakati oya tula oukuni kumwe okutungila ofikola ovakalimo vokolukanda Onawa mOshakati.

Eshi osha landula eshi ovakalimo va tutilwa kolukanda oko kelelo lodoolopa yaShakati molwaashi va kufwa peenhele davo shaashi hadi yada omeva efundja alushe pefimbo lodula.

Ngoloneya okwa holola kutya okwa didilika eshi eya koshipundi kutya ovakwashiwana ava ohava ende oinano ile oku ya keefikola da yooloka modoolopa.

“Osha fininika nge opo ndi konge omahangano aa taa dulu okukwafa nge opo ndi dule okukala nda tungila ounona ava ofikola,” Ngoloneya ta holola ngaho.

Iipinge okwa twikila kutya paife eshi ta popi ngaha, okwa mona po vamwe ovo tava dulu okutungila ounona vomolukanda Onawa eengulu dofikola odo tadi dulu okulongifwa kounona modula taiya.

“Fiyo opapa otwa mona po eengulu nhano odo tadi ka tungwa okudja kondodo yotete fiyo ondodo onhinano. Okudja opo ngeenge da pu okutungwa, ohatu kedi yandja kepangelo, di kale eengulu depangelo,” ta fatulula ngaho.

Iipinge okwa twikila kutya ova pewa nale onhele kelelo lodoolopa yaShakati oyo tai ka tungwa omatungo aa noya yelekwa nale kelelo lodoolopa.

“Ounona vetu itava dulu okukala hava ende oinona ile ngaho shaashi epangelo ola ufa ashike keshe okanona Okanamibia ka kale taka ende oshinano shili moule weekilometa mbali ngeenge takai kofikola,” Ngoloneya ta ti.

Iipinge okwa ti ofikola ei otai ka yandja omhito yoilonga kovahongi ava veli momaumbo, va dule okuhonga pofikola apa.

Okwa weda po yo kutya natango ofikola otai ka yandja yo eemhito doilonga yokuwapaleka osho yo dikwao da wedwa po.

Omupopiliko wodoolopa yaShakati Martin Kapuka okwa ti olukanda laNawa ola kala noku tembulilwa ovanhu eedula daya.

Kapuka okwa weda po ta ti olukanda paife ola ninga lakula molwa omatembu ovanhu konhele oko nopaife ola tameka ashike po Nawa yotete fiyo onhiheyali.

“Ovanhu ava va tutilwa oku otwa fya oshisho kutya o ve na olusheno, vo vali ove na yo omeva,” Kapuka ta yelifa.

Okwa twikila kutya natango ova fya oshisho kutya onhele ei oya tulwa edu leli kalekelwa olo la nhuninwa oshipangelo osho yo ofikola ngaashi tashi tongwa kungoloneya.

“Ina tu kufa ashike ovanhu tuuye tuva dipile molukanda, ndele otwa fya oshisho kutya ovanhu ava otwe va pa olusheno osho yo omeva, olo twa eta kuvo vo tava kufa mo oukefa vavo neevili davo domeva,” Kapuka ta holola.