ONGWEDIVA- Omufita ena owino yokuyandja omayele kovaholafani Laban Mwashekele okwa yelifa ta ti ka shi li mondjila ngeenge omulumenhu ta kodilile omukainhu ile te mu denge ine mu hombola shaashi natango omunhu ou oku na oufemba wokukonga po ou a panda.

“Unene tuu ngeenge omunhu ina hombolwa, osha puka ngeenge omunhu ta lopota mukwao kutya okwa ya nalye moixulo,” Omufita ta fatulula ngaho.

Meenghundafana a ninga naKundana onghela, Mwashekele okwa ti omunhu ou a holombolwa na lopotwe ngeenge ta hondele shaashi osha puka.

Mwashekele oye umwe a shiivika nawa moipopiwa yaye a popi tai tungu oshiwana moipambele yopanghalafano, a kala ta popi koradio.

Mwashekele okwa li ta popi elikwatelela koshikumhungu shomuhongifikola a monifwa oshiponga komulumenhu waye eshi a dengwa molwaashi vati mongodi yaye mwa hangika etumwalaka la tumwa okudja komulumenhu umwe po.

Okwa didilikwa oikumhungu yoiponga ile ovanhu tava dipawa kovalumenhu ya hapupala unene omo ovakainhu hava longelwa omunyonena kovalumenhu vavo ngeenge sha udika kutya ohava i momakwatafano opaihole novalumenhu vamwe po.

Mwashekele okwa ti itashi ti kutya ngeenge omulumenhu ile omukainhu ve li mo hole kape na ou ta dulu okukonga po vali omunhu ou wokomwenyo waye.

“Omunhu ngeenge ina panda mekwatafano lopaihole omo e li okwa manguluka okutala kutya okwa hala lyelye ndele ha ku denga omunhu shaashi a mona po umwe,” ta ti. Okwa yelifa ta ti ovanhu vamwe ohava kala ve li momakwatafano opaihole tava li tava pi.

Okwa yelifa ta ti ovalumenhu nava xulife po okubutaula ovakainhu ina ve va hombola shaashi ngeenge omunhu okwa mono po umwe, ota dulu oku ya.

Kombinga ikwao, Mwashekele okwa popya ta ti osha nyika oshiponga okulopota omunhu ou a hombolwa kutya okwa hondela shaashi otashi dulu okueta omafyo ile omunhu ta monifwa oshiponga.

Okwa kumaida ovanhu va hombolafana opo ngeenge va udu kutya omuholike waye okwa hondela, opo tete va shiivifile ongeleka yavo ndele omufitaongalo tava yandje omayele nghene omukundu ou una okukandulwa po.

“Okudipaa omunhu ile okumonifa oshiponga omunhu shaashi a hondela ka shishi ekandule po lomukundu ndele eshi sha fimana okungungumana noku ya kovaxungimwenyo ile kovafitaongalo okupewa omayelele,” ta ti.

Okwa ti kape na omunhu iha dulu okulundula ngeenge okwa popiwa naye meenghundafana di na ovaleli vopamhepo.

Okwa weda po ta ti kape na oudjuu iha u xulu molwaashi keshe shimwe oshi na exulilo. Mwashekele okwa kumaida ovaholafani opo va kale tava ka konga omakwafo alushe kovafitaongalo shaashi eshi otashi kwafele okukaleka po ombili.

Okwa ti ovaholafani nava kale tava popi novafitaongalo ovo ve na owino moipambele yeehombo. “A keshe omufitaongalo e na owino yokuyandja omayele moipambele yomaludi omakwatafano opahole,” ta ti.

-fhamalwa@nepc.com.na