Hambeleleni Daniel 

Hango Kornelius, okamati ka putukila momukunda Omutaku moshitukulwa shaHangwena okwa kala ena ediladilo lokushanga omambo okudja 2017 nafi yo osheshi paife ondjodi yaye yatwa eshi a shanga okambo kaye kotete kedina “The Influential Intelligence”.

The Influential Intelligence oku na omapandja 157. Okambo oka tongomona nokupopya oikumhungu ina sha nouleli, ouhamba, omalalakano nomunhu nghene ena okulixumifa komesho kuye mwene.

Okwa ti okambo aka otaka pe ovaleshi vako eude ko kutya omunhu ino pumbwa okukala wa fimana ile una eenghono opo u kale wa eta eyooloko meenghalamwenyo dovanhu.

Kornelius okwa ti ediladilo lokushanga okambo muye ole ya mo mo2017 manga ali kodula yaye yotete youlongi.

“Tete okwa li ashike shafa omashedjo kutya nandi shange okambo. Ediladilo eli olakala mo momutima wange nafiyo osheshi nda nyola okambo aka nena,” Kornelius ta ti.

Kornelius okwa ti naye vene konima eshi a ka mona kutya okwa shanga okambo, oshe mu kumwifa unene.

Okwa ti eshi a mana okambo aka okwa mona kutya ondjodi yaye oyo a kala ena okudja mo2017 paife oili ya twa novanhu apife otava lesha nokukufa mo sha mokambo kaye.

“Onda hala ovanhu va unde ko nokutya otava dulu okukwafela ovanhu nonande kave li ovanenenhu ilo kave na eenghono. Onda hala ovanhu va longife oitya yange nounongo wange opo va kale tava ningi oinima iwa kuvo vene osho yo momindingonoko davo,” ta ti.

Okwa ti omunhu ena eendunge hangeenge ashike ena odjapo, odegree ilo ena oidjemo iwa mofikola ndele omunhu na kale ena ounongo, nokushi okuulongifa .

Kornelius okwa ti paife oku na omahangano eli avali, limwe oha li ifanwa ‘Krane Farakhan Investment CC’ nalikwao oha li ifanwa ‘Farakhan College’.

Okwa ti momahangano aye oha longo shina sha nokuhonga, okulela nokukwafela ovanhu vayambule po ounongo wavo.

Kornelius okwa ti okwelineekela kutya okambo kaye ota ka kwafela ovanyasha opo va kale velineekela mwaashi tava ningi.

Okwa ti oku na natango ehalo lokushanga oumbo vahapu monakudiwa.

-hambelelenidaniel56@gmail.com