Elelo lodoolopa yaShakati ola nyamukula omakemo ovakalimo vomolukanda Onawa Extention 7 mOshakati konima eshi va ningila elelo omunyanyo wombili, tava holola omakemo avo eshi vati va pewa omafiku 14 va kale va fiya po omalukalwa avo.

Ovakalimo vomOnawa Extension 7 otava tewa peenhele davo shaashi vati ove li kufila edu nokudengela eembashu ponhele yelelo lodoopa shi heli paveta.

Ovakalimo ava ovali va pewa oule womafiku 14, vakale va fiya po onhele oyo hai ufanwa Onawa Extension 7 mOshakati molwaashi onhele oya li ya dengelwa omalukalwa kovakwashiwana ovo veli kufila oveta kuvo vene.

Mayola wodoolopa yaShakati Leonard Hango okwa yelifa kutya nonande ovakalimo ve li kufila oveta kuvo vene ngaha, eli halo ediiladilo lelelodoolopa.

“ Onhele e i otui nine omangela yakula noya nhuninwa omalukalwa opondodo ya yooloka,” ta ti.

Mayola okwa ti ova hala okuninipaleka omalukanda mOshakati, sho osho va panga eedula tava tutile ovanhu keenhele dimwe veva kufa komalukanda opo omalukanda a kale a yelekwa, nokutungwa omaumbo eli pondodo yapashinanena.

Hango okwa ti ovakalimo okwa li va fiilwa onghenda opo ponhele opo va dike po ashike omaumbo eli 112 oo aeke, ndele omaumbo aa eli po paife okwa koya onomola oyo yali ya ufwa kelelodoolopa.

“ Omwaalu waava kwali twa didilika oo ashike kwali twa ufa, ” Mayola ta ti.

Hango okwa twikila kutya ekufo lovakalimo ava peenhele davo hapo leya ombaadilila.

Okwa ti ovakala nokuninga omitumba donomenawina veva udife ko kutya onhele e i veli shiheli paveta kaishi yavo na inava pumbwa oku kala po.

Keshe ou a pumbwa olukalwa laye mwene oku na oufemba eke li shangife keembelewa delelo lodoolopa, opo a pewe onhele yaye sha dilila melandulafano.

“ Ngeenge ope na ava va hala okulanda edu ndele ove na oupyakadi woshimaliwa, natango ove na oufemba wokuhololela ovanambelwa oupyakadi wavo, vo tava talwa kutya otava ningwa ngahelipi,” ta ti.

Mayola okwa yelifa kutya ovakalimo ava ve na oulema, ile vehe na nande opapa tava dulu kudja ile ve na ounghundi wa yooloka, ove na oufemba wokuhololela elelo doolopa ouwa shili wavo opo va dule okumona ekwafo.