Namibia okwa tengeneke okuindjipaleka aatalelipo sigo opomiliona N$18,5 sho oshilongo shiipyakidhila okuxwaxwameka oshikondo shomapashiyono okupitila pautekologi.

Namibia otaka hila aatalelipo sho ta kala oshilongo shi na omauwanawa taga hili aakwiilongo nelalakano lyokukokeka eliko moshilongo.

Sha ikolelela kuuyelele wa gandja kuminista gwomidhingoloko iixwa nomapashiyono Indileni Daniel, Namibia otaka indjipaleka omapashiyino oku za 863 872 sigo opomiliona 1,8 mo2030.

Ta ti, natango otaya tengeneke okukokeka eliko moshilongo oku za momapashiyono, oku za poobiliona N$14, 3 sigo 18, 5 billion mo2030.

Daniel dhoka okwedhi popi esiku kwali taku dhimbulukwa kesiku lyomapashiyono muuyuni.

esiku ndyoka lyomapashiyono oha li dhimbulukiwa omumvo kehe momasiku 27 Septemba.

“Methimbo ndika tuli nena uuyuni owa putuka, otau longitha uutekenologi okweendela pamwe, onkene okueta po iilonga noku ninga oshimaliwa otaku xwaxwamekwa okupitula komalungula noku longitha uungomba nuutekenologi,” ta fatulula ngaaka.

Uuministeli womidhingoloko owa li wa pititha omushangwa kutya, omapashiyono ohaga dhana onkandangala meliko lyoshilongo, onkene oge na okusimanekwa.

“Elalakano lyokudhimbulukwa esiku lyomapashiyono, okukwatela po omuthigululwakalo pamukalo gokusimaneka nokutalela po omahala ngoka ge na oondjokonona dhi na ongushu,” wa shanga ngaaka.

Omapashiyono ohaga yambula po wo eliko momindhingoloko osho wo moshilongo, shoka hashi lundulula onkalo osho wo okushonopaleka onkalo yoluhepo,” wa fatulula ngaaka.

Tau ti omapashiyono oga simana oshoka otaga dhana onkandangala momindhingoloko taga holoka, ngaashi Etosha nomahala omakwawo ga gamenwa.

Wa gwedha po ta ti, iitopolwa oyindji oya kala nokuninga omauliko giipindi ngoka haga hili natango aantu ya za kiitopolwa yi li noyi ili osho wo kondje yiilongo.

Uuministeli womidhingoloko owa ti etompelo lyomatalelepo oku za poonkatu dhopevi sigo opombanda, okuweta po eliko lyoshimaliwa.

Omatalelepo ohaga eta iiyemo ya gwedhwa po moshitopolwa nenge moshilongo.

“Uuna aatalelipo ya hokwa pehala ohaya longitha nokuthiga po oshimaliwa shoka tashi yambidhidha natango aayeti po osho wo mboka taya sile oshimpwiyu ehala,”ya fatulula ngaaka.

Uuministeli owa kumagidha Aanamibia ya simaneke omahala ge na oondjokonona, ngaashi iilongo iikwawo tayi ningi.

Owa popi wo kutya iilongo oyindji otayi hupile momahala gokutalelwa po osho wo iiyetwa po yokoonyala yomithigululwakalo dhawo.

-vkaapanda@nepc.com.na