Ovalihongi vaNamibia okudja koiputudilo yopaungoba ya yooloka koshi yoNamibia Training Authority (NTA) ova li va kufa ombinga momafiyafano o National World Skills oo a ningilwa koShanghai moChina.

Ovalihongi va kalela po Namibia neudo momafiyafano opaungoba ova fika po 17. Omwa kwatelwa vamwe okudja koitukulwa yokonooli ngaashi: Oshana, Ohangwena, Omusati naikwao imwe ya wedwa po.

Osheendo shovalihongi osha kwatelwa kumwe koongoloneya voitukulwa imwe ngaashi Ngoloneya woshitukulwa shaShana Hofni Iipinge, Ngoloneya woshitukulwa shaHangwena Kadiva Hamutumwa, Ngoloneya woshitukulwa shaMusati Immanuel Shikongo, navakwao vamwe.

Omafiyafano aa okwe ya pexuulilo onghela. Pefimbo Kundana a shanga ehokololo eli, oidjemo yomafiyafano ka yali ya dja mo natango.

Ovalihongi ova li tava fiyafana momaunongo a yooloka ena sha

noungoba ngaashi veli hongela keefikola dopaungoba da yooloka oku vadja.

Eshi va fiya po oshilongo, Omupresidente Netumbo Nandi-Ndaitwah okwa lekela ovalihongi ava opo va ka longe nondjungu noku ke li tula mo mwaishe oyo tava ka ninga.

Okwe va lombwelele kutya itava ka kufa ashike ombinga momafiyafano, ndele nava ka dike yo ekwatafano liwa na China osho yo oukaume muwa noshilongo osho.

Okwa tile kutya ovanyasha nava ka teke omaunongo a yooloka movanyasha vakwao ava tava ka fiyafana navo opo va dule oku a eta keumbo.

“Omhito ei natango otai ka patulula yo eemhito doilonga molwa omaunongo aa taa ka andjakanifwa ngaha,” ta ti.

Omupedu minista wehongo Dino Balloti oo naye ali kelekelo lovalihongi ava, okwe va twa omukumo va ka tule eembuda moixwa ndele tava longo nelitule mo lela opo ashike va tule Namibia pombada.

“Mokulonga kwoye noudiinini omo ashike moku kala nelao loye leku yukilila. Pitifilile ni apa tashi dulika shaashi oidjemo yoiloga yeni otai ke li monikila,” ta ti.

-taimihaihambo2000@gmail.com