Ehangano lo Nampower melongelo kumwe nelelo lodoolopa yaNdangwa otava ka eta olusheno mokapale komaudano kaNdangwa oko keli metifa lokutungwa keemiliona N$6.

Oproyeka e i oyeli neekelwa ehangano lo NTB Engineering osho yo Faraday’s Electrical and Mechanial.

Omukulunhu woshikondo shomaungoba mOndangwa Petrus Shipanga okwa ti olusheno ota li ka kala la pwa olulongwa nokutulwa mokapale momafiku 16 Januali omudo twa uka. Shipanga okwa yelifa kutya oinima ihapu metungo lokapale otai ende nawa lela.

“Ngaashi opate e i ya yandjwa ko Roads Authority yoteya, yadja kopate ya kula ya finda kokapale oya pwa nale okulongwa neepelesenda da fika po 80,” ta ti.

Shipanga okwa twikila kutya ongwena oyo ya li ya kunwa kokapale nayo oya hapa nawa, kokapale oku na nale ovo ve na oshinakuwanifa shoku i fila oshisho efimbo keshe.

“Paife oshinima sha kula eshi twa hala okutula moilonga etungo loipundi yokukala ovanhu omutumba ngeenge tava tale etanga, nakeshe tuu osho tashi kala tashi ningilwa mokapale omu,” ta holola ngaho.

Okwa twikila kutya manga va teelala eembapila dokupitifa okondalaka yokutunga oipundi, natango ove li pyakidila yo nokukonga ovatungi voundjuwo vomonhele e i.

“Ngeenge eenhele edi doku talaleka oda pu okutungwa, nena ohatu dulu okukala tu na eespana detanga da yooloka nale tadi ya oku li deula,” ta ti. Neudo, Ngoloneya woshitukulwa shaShana Hofni Iipinge pefimbo a li ta yelifile oshiwana osho adula okuninga po moule wefimbo eli a kala mombelewa, okwa lombwela oshiwana kutya momutengenekwafaneko woshimaliwa sheedula 2026/27, ova li va tengeneka eemiliona N$60 odo di longe okapale kaNdangwa.

Iipinge okwa yelifa kutya oshitukulwa oshi na onghai youpale vetanga, noupale ava veli moshitukulwa tava dulu okukala ve li dinikilwa oupale ashike ava veli mOshakati, ashike navo ova pumbwa okukwa twa nawa shaashi oshitukulwa ohashi va longifa noitukulwa ikwao konooli osho yo ovatalelipo tava di kondje yoshilongo.