Hambeleleni Daniel

Omunafaalama woingulu Johannes Ndawedapo womomukunda Onangolo moshitukulwa shaHangwena ota yandje oilonga kovanyasha vakwao moproyeka yaye yoingulu oyo a tota eshi a pewa oshimaliwa kepangelo okupitila mombelewa yokukwafa ovanyasha hano oYouth Development Fund.

Ndawedapo ita yandje ashike oilonga kovanyasha vakwao ndele ota landifa yo ombelela yoshingulu nokuyambula po omudingonoko waye.

Okwa ti ofaalama yaye oya yandja oilonga kovanhu ve dulife po 12.

Ta ti ovanailonga vatano ova pewa oilonga tai kalelele nohava longo mokafitola kaye kokulandifa ombelela omanga vakwao ve na oilonga yopokafimbo.

Okwa ti ongeshefa yaye otai xumu nawa komesho nombelela yoingulu paife otai landwa.

“Nonande ndili momashongo osho itashi imbinge ndiye komesho. Oingulu yange oya hanga po 58 paife,” Ndawedapo ta ti.

Ndawedapo okwa holola yo kutya ongeshefa yaye oya mona ekwafo loshimaliwa okudja kouministeli wounamapya nounaimuna, eeshi, omeva nomatalululo omadu

Okwa ti okwa didilika kutya oukoshoki, oukolele noikulya ya wana po ohai kaleke oingulu ya kola no i na oukolele opo i dule okukala i na ombelela yongushu.

Omunangeshefa ou okwa ti ongeshefa yaye otai yandje oshiholelwa shiwa kovanyasha vakwao va shiive kutya navo otava dulu okukala ovayandji voilonga ndele haku kala ashike tava kongo oilonga.

Omunafaalama ou okwa holola yo kutya ofaalama yaye ohai longo ovanhu pomudingonoko waye nghene ve na okushi endifa nawa mounafaalama nomounangeshefa.

Okwa ti elalakano okuyandja owino kuvakwao opo va dule okushipondola efiku limwe lomomafiku ngeenge tava ka tota eengeshefa davo.

Ndawedapo okwa twa ovanyasha vakwao omukumo opo va ninge omaindilo opashimaliwa okudja kepangelo opo va tote eengeshefa davo vo va dule okulimonena mo oyuuyemo osho yo okukala ovayandji voilonga.

Okwa indila yo ovanyanyamaulu opo va tote eefaalama davo opo va dule okukala ve li monena sha shomondjato.

-hambelelenindaniel56@gmail.com