Omupresidente Netumbo Nandi-Naitwah onghela okwa pandula ospana yovakainhu yokatanga komokambamba ya shiivika nawa Desert Jewels eshi ya longa nondjungu okukala ya findana, yeya ponomola onhine.

Desert Jewels okwa pondola yo okushipondola okukandana okatanga komokambaba mounyuni lwotete. Oudano ou owa li moshilandopangelo Nairobi koshilongo Kenya.

Owa tamaka oshivike sha dja ko fiyo Olomakaya.

Oilongo ine mwa kwatelwa Namibia oye shi pondola okukala ya findana notai ka kufa ombinga moudo 2027 koumadano wokatanga komokambamba.

Oudano ou otau ka kala u li pamufika wopaunyuni omo oilongo ei natango tai kakondjifafana.

Oilongo ya findana oyo, 1. Uganda, 2. South Africa, 3. Malawi, Namibia e li ponomola onhi-4. Omanga oikwao ngaashi 5. Kenya, 6. Zimbwabwe, 7. Botswana, 8. Zambia, 9. Tanzania osho yo Nigeria nayo oya kufa ombinga.

Omupresidente okwa ti ovakainhu ava ova longa shi li nelitulemo okukala natango momudo tau ya tava kakalela po Namibia koudano wokatanga mokambamba pandodo yopaunyuni.

“Otwe mu pandula shili. Omwa ulika oshihopaenenwa shiwa. Iyaalo eshi mwa longa noudinini,” omupresidente ta ti.

Nandi-Naitwah okwa ti ei oyo omhito iwa ya Namibia a kale e udite etumba nehafo.

“Etulilemo mokuninga omadeulo osho yo omikalo diwa odo da eta mu kale mwa findana. Twikileni okulonga noudinini, twikileni okuhafifa Namibia,” ta ti.

Okwa pandula natango, omudeuli ou e kwetele ospana ei komesho eshi a longa nondjungu okuyandja omadeulo kovakainhu ava.

“Otwe ku pandula, twikila nokukala u kwetele ospana yokatanga komokambamba komesho. Ngeno ka kwa li ewiliko loye liwa ngeno osho ina mu findana. Omwa longa nawa,” ta ti.

Omupresidente okwa ti oku na omukumo kutya Namibia momudo tau ya natango oku na okukala a findana kefiyafano e li.

-fhamalwa@nepc.com.na