Ouministeli womidingonoko, eefuka nomapashiono Indileni Daniel okwa holola kutya eendjaba da fika po 34 oda lopotwa da dipawa moshikunino shoinamwenyo mEtosha moule weedula natu.

Daniel omwaalu ou okweu eta pouyelele eshi ali ta yandje olopota ina sha neendjaba moshikunino shoinamwenyo mEtosha.

Daniel okwa ti moule wefimbo olo tuu olo, natango eenghoshi da fika po 12 osho yo omatotongwe eli ahamano nao okwa lopotwa a dipawa kepangelo.

“Eshi sha etifa edipao loifitukuti ei, osheshi kuya oifitukuti ihapu ei ya kala nokuningila ovanhu ominyonena, omo noku li vamwe veli hanga vena omaumbo a halakanifwa po, eemwenyo da kana osho yo omapya a mona oixuna,” ta ti.

Eendjaba edi oda didilikwa unene de li teyela oshitukulwa shaMusati, nopwa kala pu na omakuyungoto moshiwashina unene tu omaipulo kutya ohadi di naana peni dili momwaalu muhapu.

“Ope na onhele imwe ili kouninginino wonooli ina eendjaba, ashike onhele oyo kai li kumwe nEtosha,” Minista ta ti. Daniel okwa twikila ta ti nande ongaho ouministeli o u na oushinakuwanifwa shoku meta apa pe na eendjaba noku tala omalinyengo ado efimbo nefimbo ashike haa dishe hadi dulu oku kala di na omalinyengo a monika efimbo keshe.

Okwa twikila kutya ngeenge da ponhokele ovanhu, onuudjuu di shune mokuti .

“Oshinamwenyo ngeenge oshe ya mokati kovanhu, nena oha shi kala ashike sha ngwangwana shoo ngeenge sha mono sha ongalelwa kovanhu, ohashi tameke tashi ashike tashi ningile ovanhu ominyonena shaashi ina shi ika okukala sha ongalelwa nokushi ngwaashingwa ngaho,” Minista tati.

Minista ta twikile vali kutya ngeenge nee ove li hange va mona eelopota di li ngaha, doinamwenyo tai li humbata momikalo da nyika oshiponga koshiwana, onghalo ohai fininike ouministeli u kufe oinamwenyo ei omwenyo, opo ashike iha piyaaneke ovanhu.

Minista okwa ti kutya edilaadilo lokutembula oinamwneyo ei nalo opo la li ashike oikwa noipangifo oyo ashike ya ya oilonga yepengelo moshipala.

Nande ongaho, Daniel okwa ti epangelo ota li kondjifa apa ta li dulu okufya oshisho kutya omalinyengo oinamwenyo okwa ngabekwa no itai kala vali ya nyika oshiponga koshiwana.

taimihaihambo2000@gmail.com