Hambeleleni Daniel 

Epeko lopolifi ola lopota ovanhu vane va xulifa moiningwanima ya yooloka osho yo oimbuluma ya yooloka ngaashi: omakwatonghonga, omateyo omaumbo, oulunga woimuna osho yo oipinga yomeendjila. Edi oda kolekwa komukulunhu wopolifi Deputy Commissioner Kauna Shikwambi.

Omafyo

Omukainhu weedula 39 okwe li tuwa a xulifa meumbo. Otaku hokololwa omukainhu a li ena ounghundi wonhumba oo wa eta efyo laye. Oshiningwanima eshi osha ningilwa kofaalama hai ifanwa Duineveld moKalkrand.

Oshiningwanima shafaafana, omukulupe womido 61 okwa xulifila naye meumbo molwa ounghundi wonhumba oo a kala ta lumbu nao. Eshi osha ningilwa moGibeon moshitukulwa shaHardap Etitano lwopo 07h20 lwaapo.

Oshiningwanima shikwao, Omulumenhu weedula 33 okwa xulifa eshi a wilwa kotuwa oyo a li ta pangele.

Oshiningwanima eshi osha ningilwa moKatutura, Windhoek Etitano lwopo 11h30 yongula lwaapo. Otaku hokololwa omulumenhu ou a li koshi yotuwa, ta pangele ndele ondjeke tai li nyenge osho sha eta otuwa i mu batekenene po nokuxilifa. Oshiningwanima shimwe , okamati keedula 13 oka xulila omanga ka li taka yowo mondobe yomeva. Oshinigwanima eshi osha nigilwa momukunda Oshikwiyu koshitukulwa shaHangwena, Olomakaya.

Oshiningwanima shimwe vali ,omusamane weedula 43 okwa xulifa pamwe nomona weedula hamano eshi va wila momulonga momudingonoko Ikaba moshikandjohoololo shaKabbe South moshitukulwa shaZambezi.

Otaku hokololwa omusamane opamwe nomukulukadi waye nounona vavo vavali va li tava tauluka omulonga mokawato okudja komukunda umwe eshi ondjabameva ya ponokela okawato ndele tava wile momulonga.

Omukulukadi nokaana kamwe ova xupa omanga omusamane nomonamati va fya komeva.

Onghendabalo yedipao

Oshiningwanima sha yooloka, omulumenhu weedula 21 okwa mangwa po eshi vati a twa nakuningwa oshikanwa nekende lobiila mofingo.

Otaku hokololwa omufekelwa a hanga nakuningwa oshihakanwa ta dana eshina ndele tava tameke okutanguna fiyo eenhamanana da ninga ookahandje. Omufekelwa okwa tondokela vati pondje ndele ta toola ekende lobiila olo a twifa mukwao mofingo. Nakuningwa oshihakanwa ota mono epango lopaunamiti moshipangelo.

Shimwe vali, omulumenhu weedula 25 okwa mangwa po eshi a ponokela nokufanga nakuningwa oshihakanwa oikando ihapu momutwe fiyo ta ngabuka nokuwila pedu. Nakuningwa oshihakanwa ota mono epango moshipangelo.

Eteyo lomaumbo 

Opolifi otai kongo omufekelwa meteyo leumbo molukanda Ngweze moKatima Mulilo. Opolifi oya holola kutya omufekelwa vati okwa teya eumbo noshiima shihe shiivike ndele ta kufa mo omaliko ongushu yoshimaliwa i fike N$12 220 mwa kwatelwa eengodi dopeke naikwao ya wedwa po.

Natango, Opolifi moKatima Mulilo otai kongo omufekelwa meteyo leumbo eshi a teya eumbo, a longifa oshinima shihe shiivike ndele ta vake mo omaliko e na ongushu yoshimaliwa shi fike N$33 000 mwa kwatelwa eengodi dopeke naikwao.

Oiponga yomeendila

Omulumenhu weedula 33 okwa xulifa sha landula eshi a lya twa kobesa omanga vati a li ta ende mopate. Oshiningwanima eshi osha ningilwa moRehoboth Etitano.

-hambelelenindaniel56@gmail.com