Ouministeli wounamapya, eeshi, omeva nedu owa holola kutya omwaalu womukifi wekondo nelaka paife owe li nanena 17 onghela okudja poikonga 10 oyo ya li ya monika nale.

Ouministeli owa holola kutya owa ningila oimuna 199 omakonakono okutala ngeenge oya kwatwa komukifi wekondo nelaka sha landula eshi ya ulika omadidiliko omo 10 ya kolekwa kutya oya kwatwa noikonga oyo oya ya pombada onghela, paife i li po 17.

Owa ti pehovelo owa ningila ashike oimuna 69 omakonakono omo oimuna ya fika po 10 ya monika omukifi ou. Konima, omwaalu ou owa ya pombada noimuna 199 omo omwaalu woimuna oyo ya monika omukifi wa ya pombada.

Ouministeli owa holola kutya oimuna ya monika omukifi wekondo nelaka aishe oya dja koshitukulwa sha!Kharas.

Omupopiliko wouministeli wounamapya nounaimuna Remeo Muyunda okwa ti omakonaakono aa okwa ningilwa oimuna okudja koitukulwa ngaashi Kharas (Karasburg 117), Khomas (Windhoek 1), Omaheke (Gobabis 50), Otjozondjupa (Otjiwarongo 30), no Oshana (Ondangwa 1).

“Ashike nande ongaho, ouministeli owa andjakaneka eendotokola okudja koipangelo yepangelo , omo nokuli epangelo la futa oipangelo yopaumwene opo i dule okuweda komwaalu weendokotola,” ta ti.

Muyunda okwa ti eendokotola ota di ka kwafa okuningila oitukulwa ya yooloka omakonakono noku tala kutya eenele dili pipo lela moshilongo da pumbwa okutulwa eeboloka okukondeka omukifi ou.

Ouministeli owa yelifa kutya engeshefo loimuna aishe i na omakondo nalo ola ngabekwa manga osho yo okulandifa ombelela yoinamwenyo aishe i na omakondo kondje nomeni loshilongo okudilila koutomeno nosho tuu.

Omukulunhu woshikondo shomayakulo oimuna Dr Kenneth Shoombe okwa yelifa kutya omukifi wekondo nelaka oo omukifi umwe wa nyika oshiponga wo vali ohau tandavele tau endelele.

Okwa ti ngeenge oshimuna sha kwatwa komufiki o u, oha shi tameke tashi ulike omadidiliko ngaashi oipute unene komulungu, meni lokanyana osho yo komakondo.

Okwa ti oshimuna ngeenge sha kwatwa komufi ou, ohashi kala tashi ulike omanganga ina shi hala okuenda shoo otashi di oluyeye komulungu.

Ta ti oshimuna ngeenge osha hangika tashi nyamifa, natango omashini asho ohaa shuna pedu molwa omukifi o u.

“Oimuna ngaashi yomomaumbo oto hange we li hanena meengobe, oikombo, eedi osho yo oingulu,” ta holola.

Ovanafaalama otava indilwa va lopote keshe edidiliko ta li ulike omukifi wekondo nelaka moimuna yavo meendelelo.

Ovanafaaalama natango ova indilwa va ha lande osho yo okuvenda oimuna yavo neevenda domukifi wekondo nelaka shaashi kashi li paveta.

-taimihaihambo2000@gmail.com