Hambeleleni Daniel

Elelo lodoolopa yaNgwediva ola indila oovene veendingosho osho yo ovaunganeki voivilo imwe opo va xulife omaweelelo avo po22h00.

Elelo lodoolopa ola holola kutya ota li ka yandja ehandukilo loN$2 000 ku keshe ou taka tauluka omango ei.

Ongwediva oya kufa etokolo e li sha landula omakemo ovakalimo modoolopa ovo tava ti ihava kofa vali nawa molwa omaweelelo novanafikola itava lesha vali veli tula mo shaashi omaweelelo a ninga mahapu unene.

Eshi otashi ningwa opo ku ninipikwe nokushuna pedu omakwelengendjo nomaweelelo oo haa ningwa modoolopa ha li kasha ha li ka toka.

Edi oda pitifwa momukanda kOmupopiliko welelo lodoolopa yaNgwediva Ottilie Shingenge.

Shingenge okwa holola ekemo lelelo lodoopa kutya omaweelelo mOngwediva okwa ninga unene mahapu molwa eendingosho noivilo yootoli tokini.

Shingenege okwa ti ova mona omanyenyeto mahapu okudja kovakalimo vaNgwediva kutya eendingosho otadi weelele unene ovakulujpe novanafikola unene tuu pefimbo lomakonaakono.

Shingenge okwa yelifa ta ti ovilo aishe inasha nomaweelelo mOngwediva nai kale hai xulile po 22h00.

Okwa weda po tati ova popya nale kwa li noovene veendingosho ndele natango itava shikula eundaneko nomilandu odo va udafana.

“O u taka dopa okulandula omango ei ya tulwa po otaka katukilwa onghatu pehe na nande oudano,” Shingenge a takela oovene veendingosho omunwe.

Okwa pula oovene veendingosho opo va kale ve na oshiwana komutima unene tuu ovakulupe novanafikola. Shingenge okwa ti elelo lodoolopa ole li longekidila okukatukila oovene veendingosho onghatu ngeenge ova mono ekemo lasha okudja moshiwana.

Okwa kumaida oovene veendingosho novaunganeki voivilo yomaweelelo ya yooloka hai ningwa modoolopa opo va shikule omilandu vo va shunife omaweelelo avo pedu.