ONDANGWA- Omukulupe weedula 72 okwa kwatwa po eshi vati a dipaa omukainhu waye weedula 32.

Oshiningwanima osha ningwa Omaandaxa, molukanda Outala mOndangwa efimbo lokonguloshi. Omukulunhu wopolifi moshitukulwa shaShana, Andreas Shilelo okwa koleka onghundana e i onghela.

Opolifi oya hokolola tai ti ovaholafani ava okwa li tava tanguna. Otaku hokololwa kutya okudja opo ova tameke okulidenga.

Vati omufeekelwa ou okwa denga omukulukadi waye neenyongo ndele ta xulifa.

Omukulupe ou ota holoka nena momhangu yamengestrata waNdangwa.

Ota pangulilwa oshibofa shedipawo osho yo omahepeko omomaumbo.

Omakonakono opolifi omoule otaa twikile moshikumh ungu eshi. Neudo okwa lopotwa omahepeko omomaumbo a londa pombada unene tuu koitukulwa yokonooli, omo ovakainhu nounona va ninga oihakanwa yokuhepekwa.

Commissioner Shilelo okwa kumaida ovaholafani opo va kale alushe tava lopota pefimbo ngeenge tava hepekwa molwaashi eshi otashi kwafele okukelela omahepeko omomaumbo. “Opolifi oya didilika ovanhu vamwe ve he hole okulopota ngeenge tava ningilwa omahepeko osho shi li sha nyika oshiponga,” ta ti.

Okwa ti omunhu ngeenge ota ningilwa omahepeko, okwa manguluka okukala a lopotela opolifi ile mushiinda shaye.

“Oimbuluma nai lopotwe pefimbo shaashi eshi otashi kwafele opolifi i ninge omakonakono noupu,” Shilelo ta holola ngaho.

-fhamalwa@nepc.com.na