OKANGHUDI- Omunyekadi omitatu Monica Geingos okwa tanga nakufya omunyekadi omutivali Penehupifo Pohamba kutya oye kwa li omupukululi waye, omuyandji mayelele a kala te mu pukulula okudja omudo 2015 eshi a ninga omunyekadi woshilongo. Okwa ti okwa kanifa kahewa kaye, omukulu waye, omunambili alushe ena oshipala tashi yolo shi yadi ombili.

“Onda kala ndi na ekwatafano liwa naye. Alushe ngeenge nda nyengwa koilonga yombelewa yange pefimbo nda li omunyekadi ohadi mu dengele ongodi handi pula omayelele,” ta ti.

Geingos okwa hokolola ta ti Pohamba okwa fiya po oshihopaenenwa shiwa sha pumbwa okulandulwa kovanyasha. “Otwa pandula oilonga iwa aishe a longa ngaashi okuyambidida ovakainhu ve li umbata,” ta ti. Omupedu Presidente Lucia Witbooi okwa tanga omunyekadi Pohamba ta ti okwa li omukainhu ena onghenda molwaashi okwa kala kondje yoshilongo ta yambidida Ovanamibia pefimbo loita.

“Namibia ota li li omupangi woshiwana, nomutekuli.

Okwa longa oshilonga shaye, okwa lwa olwoodi liwa molwaashi okwa longa noudiinini okuyambidida oshiwana,” ta ti. Ovanambia okudja koitukulwa ya yooloka ova tanga nakufya kutya ka kwa li ena okatongo shaashi okwa yambidida ovanhu vahapu.

Omupedupresidente wehangano lovanhu ve na oulema woshipa, Walda Kambambi okwa hokolola ta ti Pehehupifo Pohamba okwa kala nokuyambidida ehangano lavo okuyandja omaadi okuvava, omambale omutenya osho yo omakende okomesho. Okwa ti ovanhu vahapu ve na oulema woshipa ova mona omauwa okupitila mombelewa yaPohamba. “Otwa kanifa meme wetu ena oshisho novanhu ve na oulema. Okwa fiya po omwaka wa kula itau dulu okufitikwa shaashi okwa li omuyambididi wetu,” ta ti.

Kambambi okwa ti Pohamba okwa li alushe ehole okupula omadina ovanafikola ve na oulema woshipa ovo va pumbwa omaadi okuvava.“Ngeenge onde mu lombwele ohatu mu omapakete muna omaadi ndele hatu topolele ounona.

Ohandi pandula oilonga iwa a longa mehangano,” ta ti.

Mayola wodoolopa yaHelao Nafidi Darius Shaalukeni okwa ti omunyekadi Pohamba okwa dana onghandangala yokueta mo exumokomesho modoolopa yavo. Okwa ti Pohamba okwa li a tula moilonga opo a tunge oshipangelo modoolopa yaHelao Nafidi.

“Okwa kala alushe ta lalakanene okueta omayakulo ouhaku popepi noshiwana ngaashi oshipangelo shonena modoolopa yetu,” ta ti. Darius okwa ti Pohamba ka kwa li ashike ta lalakanene exumokomesho modoolopa yavo ndele okwa dana onghandangala ya kula koitulwa ya yooloka okuyambidida oshiwana. “Ohatu twikile okudimbuluka oilonga aishe yaye iwa oyo a longa nokukala twa landula oshihopaenenwa shaye shiwa a fiya po,” ta ti. Ngoloneya mukulu waHangwena Billy Mwaningange okwa ti ota dimbuluka omudo 1974 pefimbo olo va ya kombada koAngola pamwe nanakufya omunyakadi Penehupifo Pohamba. “Otwa ya kombada pefimbo loita ndele hatu longo nondjungu nelalakano Namibia opo a kale a manguluka,” ta ti.

Okwa ti Pohamba okwa li omupangi woshili shaashi okwa kala ta yambidida ovakwaita okuvapa omiti nelalakano lokukwashipaleka kutya ove na oukolele. Pohamba okwa fiya po ounona vatano osho yo omushamane waye Omupresidente omutivali Hifikepunye Pohamba. Omalongekido epako laye oku li metiva.

-fhamalwa@nepc.com.na