OSHAKATI- Omupolifi ou a yasha nokudipaa nondjebo omulumenhu weedula 23 ota ningilwa omakonakono, omo epeko paife la tumwa kombelewa yomupangulindjai.

Edi oda kolekwa komukulunhu wopolifi moshitukulwa shaShana Commissiner Andreas Shilelo onghela eshi a ninga eenghundafana naKundana.

Oshiningwanima osha ningwa omwedi wa dja ko kendiki lomangeshefelo kEtango mOshakati efimbo lomutenya.

Nakufya okwa tongololwa oye Titus Titu, a dja molukanda Uupindi mOshakati.

Okwa yelifa ta ti omupolifi ngeenge a dipaa ile a lemaneka omunhu oha ningilwa omakonakono.

Shilelo okwa hokolola ta ti omulumenhu ou okwa ya ponhele opo apa londekelwa ovanhu ngeenge va uka kOnhuno ndele ta nyeke omukainhu ongodi yaye.

Okwa faduka po nokonima ovakwashiwana va hangika ponhele opo ova tamake okutaata omulumenhu ou.

Otaku hokololwa kutya opolifi oya dengelwa ndele tai waimine oshiwana okutaata omulumenhu ou.

Opolifi oya hokolola tai ti eshi omupolifi kwa li ta kendabala okupopya nomulumenhu ou kutya na yandje ongodi yovanhu, okwa kufamo ombele yaye.

Otaku hokololwa kutya okwa li a hala okutwa omupolifi nombele.

Opolifi oya hokolola tai ti okudja opo omupolifi okwa kufa mo ondjebo yaye ndele vati ta yashe omulumenhu ou komutwe.

Kouyelele wa dja kopolifi, otaku hokololwa kutya omulumenhu ou okwa twalwa koshipangelo shaShakati opo a ka mone epango lopaunamiti.

Okwa xulifa shike moule wovili eshi a fika moshipangelo.

Opolifi oye weda po kutya natango omulumenhu ou okwa hangika e na ongodi imwepo i li mondjato yaye, omo taku feekelwa kutya pamwe okwei nyeka omunhu.

Oshiwana okwa li sha nyika oluhodi konima eshi omulumenhu ou a yashwa komutwe tashi popi kutya ngeno omulumenhu ou a yashelwe komaulu.

Okwa didilikwa ovanhu paife va ninga oihakannwa kokuyanshwa kopolifi unee tuu ngeenge tava kendabala okulwifa opolifi.

Omudo wa dja ko kOnhuno okwa lopotwa omulumenhu ou e li omushingi weloli a xulifa eshi vati a yashwa komupolifi pefimbo kwa li ta kendala okulwifa omupolifi keinda lopolifi li li pOnhuno.

Omudo 2023, natango koshitukulwa modoolopa yaEenhana, okwa lopotwa omulumenhu a xulifa eshi vati a yashwa komupolifi pefimbo kwa li ta kendabala okulwifa opolifi.

Opolifi oya kumaida oshiwana opo shi xulife po okukulwifa ovapolifi shaashi osha puka noshi li sha nyika oshiponga ngeenge omunhu ta kufile ovapolifi oshilwifo.

Oshiwana sha kumaida kutya ovapolifi ovanhu tava longo pambelewa okutula po elandulafano neameno loshiwana nokukelela oimbuluma. -fhamalwa@nepc.com.na