Omupopiliko welelo lOukwanyama Andrew Naikaku okwa ti ka shi li mondjila ngeenge omufiyekadi ta taatawa meumbo molwaashi pamufyuululwakalo iha shi ningwa.

Okwa yelifa ta ti omufiyekadi oku na oufemba wokukala meumbo omo a fiwa komusamane waye.

“Omukainhu a hombolwa paveta ile i na hombolwa ashike meumbo omo okwa kala mo efimbo lile, nena oku na oufemba woku pewa po eumbo,” Naikaku ta fatulula.

Naikaku okwa li ta popi elikwatelela koshikumhungu shomufiyekadi a dengwa komonamati oo vati a dalwa ashike komusamane waye ndele hae emu dala.

Otaku hokololwa kutya omulumenhu ou natango okwa li ta kendabala okutaataya mo ina meumbo.

Oshiningwanimwa osha ningwa konima yoivike ivali momukunda Oushini moshikandjohoolo shaMundaungilo, moshitukulwa shaHangwena.

Omulumenhu weedula 25, ou vati a denga ina oku li modolongo.

Omukulunhu wopolifi moshitukulwa shaHangwena Commissioner Ottillie Kashuupulwa okwa koleka oshiningwanima eshi. Omutamanekwa ou okwa holoka momhangu yamengestalata wEenhana shivike sha dja ko.

Okwa a nyenwa omhito yokuli futila mo modolongo.

Ota pangulilwa oshibofa shomahepeko omomaumbo osho yo shonghendabala yedipawo. Otaku hokololwa kutya mwene weumbo okwa xulifa ashike konima yoivike ivali.

Mwene weumbo oye nee a dala omulumenhu.

Opolifi oya hokolola tai ti okudja opo omulumenhu ou okwa tameka okukala tava tanguna naina, hano omukainhu ou a hombolwa kuxe.

Vati ova tameka tava kondjele eumbo.

Otaku hokololwa kutya omutamanekwa ou okwa lombwela ina kutya na dje mo meumbo shaashi vati manga xe e li momwenyo okwe mu lombwela kutya eumbo ota li ningi laye.

Opolifi oya hokolola tai ti omulumenhu ou vati okwa kala nokuningila ina omatilifo.

Vati efiku limwe okwe mu kufila oshitenda ndele te mu taataa a uka mepya a hala oku mu denga.

Omakonakono opolifi otaa twikile moshibofa eshi.

Naikaku okwa hokolola ta ti oikumhungu yovafiyekadi tava taatawa momaumbo itai ulike efano liwa moshiwana.

“Omunhu okwa dengwa nale pomutima kefyo lomusamane waye ndele natango ota li lile vali komwenyo eshi ta taatawa meumbo,” ta ti.

Okwa ti omafimbo amwe oshiwana na shi kale shi na olukeno lovafiyekadi.

Okwa kumaida ovafiyekadi ngeenge tava hepekwa momaumbo opo va kale tava lopotele opolifi pefimbo molwaashi eshi otashi kwafele okukelela oiponga nomafyo.

“Elelo lOukwanyama nalo ota li ka konakona kombinga yoshikumhungu eshi,” ta ti. Naikaku okwa kumaida ovakwapata opo va kale tava kundafana kombinga yoikumhungu yoludi eli.