Ounona vavali ova kwatwa onghonga komulumenhu ehe shiivike ndele vati ta faduka po.

Oshiningwanima eshi osha ningilwa komukunda Maltahole moshitukulwa shaHardap, mexulishivike.

Omupopiliko wopolifi omupedu komufala Kauna Shikwambi okwa koleka onghundana ei.

Opolifi oya hokolola tai ti okaana kamwe oke na eedula hetatu omanga kamwe ke na eedula 11. Oonakuninga oihakanwa paife ove li moshipangelo tava ningilwa omakonakono opaunamiti.

Oshiningwanima shikwao, omukainhu weedula 21 vati okwa dengwa ndele ta kwatwa onghonga komulumenhu ehe shiivike.

Oshiningwanima osha ningwa mexuliloshivike modoolopa yaKahandja efimbo loufiku.

Otaku hokololwa kutya omukainhu ou okwa nhukilwa komufeekelwa pefimbo kwa li ta ende oufiku ndele ta dengwa nokulongelwa omunyonena wopaixulo.

Okwa tambulilwa moshipangelo omo eli ta mono epango lopaunamiti.

Oshiningwanima shikwao, omukainhu weedula 23 naye okwa tambulilwa moshipangelo kOutjo ta mono epango lopaunamiti eshi vati a kwatwa onghonga kovalumenhu vatatu.

Otaku hokololwa kutya nakuninga oshihakanwa okwa li ta ende oufiku mondjila ndele ta nhukilwa kovalumenhu noku mu longela omunyonena wopaixulo.

Opolifi oya hokolola tai ti kape na omufeekelwa a kwatwa po fiyo onena.

Okwa didilikwa ovakainhu va ninga oihakanwa yokukwatwa onghonga ngeenge tava ende oufiku ashike ovalumenhu ohava faduka po.

Opolifi oya kumaida ovakainhu opo va kale va kotoka ngeenge tava ende etango la ningina shaashi paife osha nyika oshiponga unene tuu ngeenge omunhu a kwatwa onghonga komulumenhu ndele ta faduka po.

Oshiwana osha kumaida natango, opo shi kale ta shi twala pefimbo ovanhu koipangela ovo va ninga oihakanwa yomakwatonghonga molwaashi otashi kwafele omunhu a mone epango lopaunamiti pefimbo.

-fhamalwa@nepc.com.na