Opolifi moitukulwa Oshana, Ohangwena osho yo Omusati oye li manga oukuni kumwe okukonga ovafekelwa ovo va ponokela oshihakanwa pendiki lombaanga yakula yo Bank Windhoek mOshakati.

Otaku hokololwa nakuninga oshihakanwa ali eya okupungula oimaliwa Etitano.

Olopota yopolifi oya holola kutya oshihakanwa pombaanga osheya ko eevili dongula yEtitano nelalakano loku ka pungula oimaliwa meni lombaanga i fike poN$57 000.

Opolifi oya twikila kutya oshihakanwa eshi sha fika ashike poshivelo shopombaanga, osha ponokelwa kovalumenhu ovo vomwaalu inau shiivika natango.

Ovafekelwa vati ova li vena ondjebo, oyo va umba mombada nokunyeka oshihakanwa ondjato yoimaliwa.

Konima yokunyeka oimaliwa nokudja po poshiningwanima ngeno tava endelele, opolifi oya koleka kutya ohauto ei veya nao oya pumwa noku fikama manga.

“Eshi va mona kutya ohauto yavo itai ende vali, ova undula omushingi wohauto oyo va hanga mondjila, oo naye a hangika eli poshiningwanima, ndele tava faduka po nosheendifo shaye,” opolifi tai yelifa.

Konima ohauto oya ka hangika pofikola yedina Mwadina Gwanembenge mOshakati ihe na nande omunhu.

Ovakwashiwana eshi va mona otuwa ei ya nyekelwa omunhu kombaanga ova nhofwela ko opolifi meendelelo ashike mokufika poshiningwanima ova lombwelwa kutya ovafekelwa ovakufwa po nale kotuwa yoCamry itoka ihe na nomola, nova yuka ondjila ya Mungwelume moshitukulwa shaHangwena.

Fiyo onghela, opolifi oya li ya yelifa kutya kape na nande oumwe a kwatwa, nolukongo ota li twikile.

Opolifi oya holola yo kutya otava twikile nolukongo lovafekelwa ava, unene keengaba daNamibia na Angola shaashi ovafeekelwa otava dulu okukala va ya moAngola tava kanifa oikoti.

-taimihaihambo2000@gmail.com