Hambeleleni Daniel

Ehangano loSinomine ola shakeneka epangelo ondjilakati eshi la yandja N$100 000 kombelewa yoshitukulwa shaShikoto.

Oshimaliwa osha nhuninwa okukwafela okuyambula po eeproyeka nexumokomesho lomoshitukulwa shaShikoto.

Ekwafo eli ola yadjwa kOmukulunhu wehangano lo Sinomine Logan Lou.

Oshimaliwa osha tambulwa ko kuNgoloneya woshitukulwa shaShikoto Sacky Kathindi okukwatela komesho eeproyeka nexumokomesho loshitukulwa.

“Onda pandula unene koshimaliwa eshi.

Eyambidido leni ota li ulike kutya omwa hala okulongela kumwe nepangelo opo tu kwafele oshiwana shetu shi xume komesho,” Ngoloneya ta holola ngaho.

Kathindi okwa ti exumokomesho ita li dulu ashike oku etwa kepangelo olo alike ndele ota li pula elongelo kumwe oku dja koikondo yopaumwene osho yo ovakwashiwana kuvo vene.

Okwa udanekela ehangano lo Sinomine kutya oimaliwa ei va yandja otai ka longifwa nawa nomouwa wovakwashiwana.

Ngoloneya okwa ti okwa pandula unene ehangano eli nokwa pula omahangano makwawo a kufe oshihopaenenwa shiwa kehangano eli.

Omupedupresidente wehangano lo Sinomine Barcelona Tsauses okwa ti ova hala okuyadja oilonga kOvanamibia unene tuu ovanyasha opo va yambule po oitalendi yavo.

Okwa weda po kutya ehangano lavo ota li longele kumwe noiputudilo yopavali yepangelo Unam no NUST.

Okwa holola kutya Sinomine ha po ta kwafa epangelo lwotete.

Okwa ti odula ya dja ko, ehangano ola yandja eemiliona N$4.6 nokukwafa eefikola da yooloka.

Tsauses okwa ti natango ove na ediladilo loku eta oshikunino modoolopa ya Tsumeb.

hambelelenidaniel56@gmail.com