OSHAKATI- Ovakwanedimo vomunafikola ou a tambulilwa moshipangelo shaShakati eshi a monifwa oshiponga komundilo otai pula ekwafo loshimaliwa kovasamaria ovanamutimanghenda opo va yambididwe nelalakano lokutwala omonamati koshipangelo koSouth Africa ile koipangelo imwe po yopaumwene.

Vilio Nekongo weedula 13, oha fikola kofikola Elambo Combined i li moshitukulwa shaShikoto, noku li mondodo onhiheyali.

Otaku hokololwa kutya omunafikola ou okwa dja kofikola ndele ta hanga onduda yaye ya tema omundilo.

Monduda okwa li muna omaliko aye nokonima okwa nhukila monduda nelalakano lokukufa mo omaliko aye.

Otaku hokololwa kutya mupya munene eshi okamatyona aka ka ya monduda ya tema omundilo, oikututu yako oya haka omundilo ndele ta kapi. Omunafikola ou eshi a dja monduda a tema omundilo okwa fanduka po ndele ta nhukile momufima u li mekove lambulavo. Pefimbo a ninga eenghundafana naKundana, xe yomunafikola Salom Nekongo okwa hokolola ta ti okudja pefimbo okaana kavo kwa li ka tambulilwa moshipangelo sha Medi Park shopaumwene ova longifa oshimaliwa shi fike pomiliona imwe.

“Okwa ninga oule womwedi moshipangelo shopaumwene. Natango otu na eendjo doshipangelo da fika poN$30 000, da pumbwa okufutwa,” ta ti. Nekongo okwa ti otava pandula keyambidido keshe tava mono okudilila moshiwana molwaashi ove li moupyakadi wa kula.

Okwa ti otashi kwafele ngeenge ova tumu okaana kavo koshipangelo shopaumwene nelalakano lokumona epango lopaunamiti doshinanena. “Moshipangelo shopaumwene okwa dja mo shaashi oimaliwa yetu oya pwa po. Onda kala ashike nokulandifa po eengobe opo ndi mono okamaliwa shokukufuta oshipangelo,” ta ti.

Omunafikola ou okwa popya ta ti okwa hala okushuna kofikola opo a ka twikile nelihongo laye.

Omukulunhufikola pofikola Elambo Combined Filemo Dhikwa pamwe novahongifikola vakwao ova nina onghendabala yokuongela oshimaliwa shi fike poN$3 700 ndele tava yandje kuina womuhongwa wavo.

“Paife ngaha onda yandje omikanda kovanafikola vomofikola yetu ve li 770 opo keshe omunafikola a yandje o N$5, nelalakano lokuyambidida omunafikola mukwao,” ta ti.

Dhikwa okwa ti natango pamwe novahongifikola vakwao ove li pyakidila nokuongela vali oshimaliwa shokuyambidida omunafikola. Omukulunhufikola okwa ti ofikola yavo oi na olukeno nomunafikola ou shaashi okwa mona oshiponga neenghono.

Okwa ti omunafikola ou oku na omaano molwaashi okwa kala alushe a piti e li ponomola yotete.

Dhikwa okwa weda po ta ti omunafikola ou natango okwa kala a kufa ombinga moinyangadalwa yomafiyafano yoshilongwa shounongononi. “Okwa kala a mono omapapa mahapu shaashi oha longo noudinini,” ta ti.

Okwa hokolola ta ti okamatyona aka oke na omikalo nokukala taka ulike oshihopaenenwa shiwa kovanafikola vakwao.

Kansela woshikandjohoololo shEengodi Saara Shikokola okwa ti naye ombelewa yaye oya ongela oshimaliwa shifike N$7 000 ndele tava yambidida omunafikola ou.

-fhamalwa@nepc.com.na