Elelo lopamufyuululwakalo laUkwangali moshitukulwa shaKavango West ola pewa omaano embakumbaku kehangano loIndongo Group.

Embakumbaku oli na ongushu yoshimaliwa shi fike N$800 00.

Embakumbaku ola yandja opo Ovakwangali ve li kwafe nalo mounamapya opo va dule okumona oikulya ya wana.

Embakumbaku ola yandjwa pambelewa kOmuprima minista Elijah Ngurare mOsoondaxa.

Eshi a yandja embakumbaku kelelo lopamufyuululwakalo, Ngurare okwa pandula Indongo Group eshi a wanifa po oshinakuwanifwa shokukwashilipaleka kutya ova yandja moshiwana.

“Eshi otashi ulike oshiholelwa shiwa kutya ovanangeshefa nomahangano otaa shakeneke epangelo ondjilakati opo va yandje omakwafo moshiwana nokukwashilipaleka kutya ovo veli momhumbwe ova mona aishe vei pumbwa,” Omuprima ta holola ngaho.

Okwa ti embakumbaku la yandjwa ota li kwafa ovanafaalama vomomudingonoko unene ovo itava dulu okufuta omambakumbaku osho yo omashina amwe oo haa longifwa paunamapya.

“Natango, embakumbaku ota li ka yakula mo omambakumbaku epangelo,” ta ti ngaho.

Omuprima okwa holola kutya eshi otashi holola ekwatafano liwa pokati kepangelo, omalelo opamufyuululwakalo osho yo omahangano. Ta ti ngeenge ova twikile okutula omaupyakadi a taalelwa moshiwana pokati ngaha, nena otava ka hanga shihapu kohainga. Oshitukulwa shaKavango West oshi li shimwe shomoitukulwa oyo i na edu lina oushosho wa wana osho yo omeva okudja momulonga waKavango.

Ngurare okwa indila oshiwana shomoshitukulwa opo shi li kufe koshi, shi ninge ounamapya nounaimuna oo kamana kandongo moshitukulwa. Ta ti otava dulu okulonga oikulya ofulundundu ngeenge ove li tula mo.

Okwa ti embakumbaku ota li ka pulula onhele yakula shi dulife eshi ovanhu tava limi neenyala, osho tashi ka eta yo eteyo loikunomwa li li pombada.

Embakumbaku ola yandjwa, sha landula eenghundafana pokati kOmuprima osho yo Omunashipundi wo Frans Indongo Group Martin Kaali Shipanga.

Omuprima, okwa ti okwa ya meenghundafana naShipanga moshitukulwa shaShikoto, sha landula eshi a li meenghundafana naHompa Eugene Siwombe Kudumo kombinga younamapya nounaimuna unene okulonga oikulya melelo laUkwangali.

Eshi sha eta fiyo va unganeka ouvalelo wowina opo va ongele oshimaliwa shokulanda embakumbaku nehangano Frans Indongo ola li la itavela okuva pa embakumbaku.

Ngurare okwa indila omahangano novanangeshefa Ovanamibia opo va kufe oshiholelwa shiwa kehangano lo Indongo,va kale tava yandje omakwafo taa tungu oshiwana nokulundulula eenghalamwenyo davo unene tuu komikunda.

Okwa pula ehangano eli opo li twikile okukwafa oshiwana ngaashi veshi ningila Ukwangali.

Ngurare okwa ti embakumbaku e li ove li pewa konima eshi kwali tava ongele oshimaliwa opo va ka lande embakumbaku lavo.

-hambelelenindaniel56@gmail.com