Victoria Immanuel 

Uuministeli womauyelele nomakwatathano gopaungomba otau kongo omupopi a pyokoka nawa a ka kale konima yembako koshigongi shomauyelele nomakwatathano.

Oshigongi shoka osha tengenekwa shi ka ningwe oshikando oshitimugoyi, tashi ka ningilwa kOngwediva moshitopolwa shaShana momasiku 12-13 Oktomba nuumvo, okuza potundi 08h00 sigo 17h00.

Onkene uuministeli otau kongo ngoka ena ontseyo yoku wilika, opo a tume omayalulo ge mesiku limwe, gomasiku ngoka gaali.

“Ngoka ena ehalo na tume ontumwafo tayi tongonona, ontseyo ye, iituthi a wilika nale osho wo oonomola dhoka tadhi vulu okupulwaapulwa kombinga yiilonga ye,” ya shanga ngaaka.

Kuuyelele wa gwedha po dhengela Omunambelewa pitithi konomola

0811618674 nenge mu tume ko email: Matty.Kaminzi@mict.gov.na, omanga omasiku 25 Septemba inaaga pita.

Eyithano lyokuwilika iituthi otali dhana onkandangala, sho aanyasha taya longitha uunyakwa wa wo okuwulika iituthi.

Oshiindingili shoka otashi ka gongela oshigwana okuza koombinga noombinga sho taku ka kundathanwa uuwanawa womakwatathano osho wo uungomba.

“Otaku gandjwa wo omalongo nkene omakwatathano gopashinanena ga simana nankene taga humithakomeho oshilongo,” ya shanga ngaaka.

Uuministeli womauyelele owa ti oshiindingili shoka natango otashi ka gandja wo omalongo nkene oongeshefa tadhi vulu okuhwahwamekwa okupitila pautekonologi.