Hambeleleni Daniel 

EENHANA-Ovalandifi vomomapandaanda mEenhana ova kunghililwa opo va kale tava landifile peenhele odo da ufwa okukala tava landifile kelelo lodoolopa.

Ovalandifi ova pewa fiyo okexulilo la Septemba opo va kale va fiya po eenhele odo ve li kufila voovene nove li opo hava landifile paife.

Elelo lodoolopa yEenhana ola li la ongaleka ovalandifi vomomapaandanda opo veva tungike kombinga yomilandu odo vena okukala va shikula onga ovanangeshefa modoolopa yEenhana.

Oshiongalele, okwa li sha etelela ovanambelelwa vopolifi, NamRA novalandifi Ovaangola.

Opolifi oya yandja elongo moshiwana nghee vena okukala tave li ufa keemhango ngeenge ve li modoolopa.

Omukulunhuwiliki wodoolopa yEenhana Wodipo Haulofu okwa ti ovalandifi vomopandaanda nava li ufe komilandu domopandaanda, odo da tulwa po mo2012.

Okwa ti kape na omulandu upe wa tulwa po ashike omilandu dikulu odo ashike vena okulandula.

Haulofu okwa yelifa kutya ovashingifi vomomapandaanda ova pewa fiyo okexulilo la Septemba opo va kale va dja mo momikala omo hava landifile shi he li paveta ndele tava i keenhele odo da ufwa.

Omukulunhuwiliki okwa ti fiyo opapa ovalandifi ashike veli 380 veli shangifa mombelewa yelelodoolopa.

Okwa ti ope na nale eenhele odo dili po ovalandifi tava dulu oku ka landifila ngaashi komatala, e li lwoposhipangelo shakula.

Ovalandifi vamwe okwa ti otava ka tulwa komatala oo eli kEkolola.

Haulofu okwa kunghilila ovo inava shangifa eengeshefa davo natango opo va kale veshi ninga diva opo veli teteke eenhele odo dili po manga i na di pwapo.

Okwa ti otava longele kumwe nopolifi opo va kwafele ovalandifi vomopandaanda va kale veli keenheele da amenwa.

Haulofu okwa weda ko ta ti omalongekido okwa tameka. Okwa holola kutya ota

ka shiivifila ovalandifi okudja mo21 fiyo 28 Septemba kutya ova fikama peni.

Ashike nande ongaho, ovalandifi vomomapandaanda ova lya meenyandi molwaashi vati ove wete tava ka ekelwashi molwaashi keenhele dimwe oko tava ka tulwa odi li kokule novalandi. Joseph Valombola oo naye eli omulandifi womopandaanda okwa hokolola ta ti kave li omhinge noku ya keenhele odo ta ku tiwa nava ye, ndele ova hala keenhele oko ku ningwe nawa tete. “Otwa hala exumokomesho li tu tetekele ndele hatu shikala ko nawa,” Valombola ta holola.

Okwa ti nava tule ko oinima oyo tai dulu okukala tai nane ovalandi ngaashi onhele yokulondekela eetaxi. Tresia David okwa ti keenhele dimwe oko ta ku tiwa nava ye, okokule unene ngaashi kEkolola. Ta ti kape na ou ta dulu okukala ta fiki ko kolukanda oko.

“Kape na omunhu ta dulu okukala tadi ko Evelina te ya okulanda oufila wongava ile omatama,” David ta holola ngaho.

-hambelelenidaniel56@gmail.com