EENHANA- Ovalandifi vomomapandaada modoolopa yEenhana ova yandja omukandanyenyeto wavo kuNgoloneya woshitukulwa shaHangwena Kadiva Hamutumwa tava pula opo e va popile konima eshi va pewa elombwelo kelelo lodoolopa opo va xulife po okulandifila momapandaanda.

Etivali okwa li va holoka momwaalu muhapu tava nyenyeta ve li ofika komesho yombelewa ya ngoloneya.

Ombelewa yomukulunhuwiliki welelo lodoolopa yEenhana, Wodibo Haulofu oya shanga omukanda Etivali tava lombwele ovalandi vomomapandaanda kutya nava kale va kufa po oinima yavo peenhele opo tava landifile.

“Omunhu keshe taka hangika ta landifile momapandaanda oinima yaye otai ka kufwa ko kelelo ndele itei pewa vali,” ta ti.

Haulofo okwa lombwela ovalandi vomomapandaanda aveshe opo va ka landifile komatala.

“Otwa tunga omatala mape noku na onhele ya handjuka nawa tai dulu okulongifwa kovanhu vahapu ngeenge tava landifa,” ta ti.

Okwa weda po ta ti elelo lodoolopa yavo okudja omudo wa dja ko ola kala nokulombwela ovanhu opo va xulife po okulandifila momapandaanda ashike ina va hala.

Haulofu okwa ti elelo ola faneka okukala la eta po exumokomesho modoolopa ashike itashi ulike efano liwa ngeenge ovanhu tava landifile keshe pamwe, osho natango sha eta ekako modoolopa.

Onghela elelo lodoolopa yEenhana ola tameka okuhanauna po outala vamwe po opo apa landifile ovanhu.

Konima yoivike ovalandifi vomomapandaanda okwa li va ninga omutumba nelelo lodoolopa yEenhana nelalakano lokukundafana nghene kombinga yonghalo yokulandifila momapandaanda ashike omutumba ou i na u xula nawa shaashi elelo novalandifi ina va twa kumwe.

Natango, omudo 2022 ovalandifi vomomapandaanda okwa li ve li denga mumwe nelelo eshi kwa li tava taatawa kutya inava landifila va li okapana momapandaanda.

Ovalandifi otava nyenyeta tava ti ngeenge ova i komatala itava ka mona vali ovalandi vahapu tava lande oinima yavo.

Natango, ova popya tava ti omatala okwa tungwa a shona, onghee otava ka kala ashike va finana mo nokukala tava futu ondilo.

Ngoloneya waHangwena Kadiva Hamutumwa okwa tambula ko omukandanyenyeto wavo.

Okwa ti otaka kundafana nelelo lEenhana kombinga yoshikumhungu eshi.

-fhamalwa@nepc.com.na