KUNENE- Oshivike sha dja ko, Omupedupresidente Lucia Witbooi okwa ninga omafiku ane moshitukulwa shaKunene nelalakano lokutalela po oshiwana shomuhoko wovayelele osho yo okudidilika omashongo va taalela.

Witbooi okwa telela po oikandjohoololo ya yooloka osho yo eefikola nombelewa yangoloneya waKunene.

Okwa li natango a ninga omutumba nomalelo opamifyuululwakalo a yooloka o moKunene okukundafana nghene epangelo ta li kwafa oshiwana.

Oshitukukwa shaKunene osho shimwe sha didilikwa shi na omwaalu muhapu wovanhu ovo va talika ko ve li konima yefiya noha va mono okwafo okudilila kepangelo. Omupedupresidente okwa ti ombelewa yaye oi na oshinakuwanifa shokutalela po oshiwana sha dja momuhoko wovanhu ovo va talika ko ve li konima yefiya koitukulwa ya yooloka osho yo okukwashipaleka kutya ovanhu ova pewa omakwafo okudilila mombelewa yaye.

“Okudja omudo wa dja ko eshi nda ulikwa kOmupresidente Netumbo Nandi-Ndaitwah, eshi oshi li oshikando shotete handi talele po oshiwana shomOkunene,” ta ti. Okwa weda po ta ti okwa talela po natango oshiwana shokoshitukulwa shaHangwena, Omaheke nosho tuu oitukulwa imwe po ya yooloka.

Okwa popya ta ti ombelewa yaye otai twikile okuyambidida oshiwana sha talika ko shi li konima yefiya osho yo ovanhu ve na oulema.

“Omakwafo okwa kwatela mo okuyandja oikulya, oikumbafa, okukwashilipaleka kutya ovakulupe neefiye otava kwata opeendjela osho yo okufutila ofikola ovanyasha tava di momuhoko woshiwana sha talika ko shi li konima yefiya ngeenge tava i koiputudilo ya yooloka yopombada,” ta ti.

Pefimbo a talela po ofikola, Dr Albertina Amadhila Combined i li momukunda Otjomuru, okwa pandula ovadali eshi va tuma ounona vavo vaye kofikola.

“Paife Namibia okwa manguluka nokwa xuma komesho. Osha fimana ngeenge ta mu tumu ounona veni vaye kofikola opo okaana keshe ka kale ka hongwa okuvalula, okulesha nokushanga,” ta ti. Witbooi okwa ti oshiwana ina shi landula vali eenghulunghedi dinya doshikulu shonale shokukala tava pitike ounona va kale momukunda tava lifa oimuna.

“Okaana keshe naka ye kofikola. Onda hala okumona momudingonoko weni ta mu di eendokotola, ovapangi, ovahongifikola osho yo ovanhu vomaifano a yooloka,” ta ti.

Okwa kumaida ovadali opo va kale tava longo nelitule mo okupopya nounona vavo voukadona nghene ve na okuliumbata opo ku keelelwe vaha ninge omateelelo.

“Omateelelo okwa nyika oshiponga kovanafikola shaashi otaa piyaneke elihongo lavo. Ovalumenhu nava kale kokule noukadona ndele tava yandje omhito kovanafikola ve li honge,” ta ti.

Omupedupresidente pula ovadali opo va longele kumwe novahongifikola okuyambula po elihonge novanafikola.

“Itashi ti kutya eshi mu li momuhoko woshiwana shi li konima yefiya kale ni ta mu ningilwa omahepeko ile omaliko e ni taa vakwa po. Nanye ovanhu ngaashi naana ovanhu aveshe ve li moshilongo,” ta ti.

Witbooi okwa ti omashongo aeshe a taalelwa koshiwana okwa didilika notaka kundafana novanambelewa tava longele ombelewa yaye nghene e na okukandulwa po.

-fhamalwa@nepc.com.na