Екипите на Бешикташ и на Анадолу Ефес остварија победи во своите натпревари од шестото коло во Евролигата. Анадолу Ефес со 70:85 славеше на гостувањето кај Жалгирис и ја запиша втората победа сезонава.

Кошаркарите на Ефес со одлична игра во првата четвртина која ја добија со 12:21 ја најавија победата. Домашните кошаркари се обидоа во вторите десет минути резултатски да се вратат во игра, дојдоа до 36:42, во третата четвртина имаа и три поени негатива (45:48), но Анадолу Ефес одговори со мини серија од 0:5 и повторно и набрзо повторно ја врати двоцифрената предност.

Со мирна игра во последниот период, гостите ја зачуваа предноста и на крајот славеа со 70:85.

Стразел со 19 поени, Пејн со 16, Малколм со 15 поени и Дарио Шариќ со 14 поени и 10 скока беа најдобри кај Анадолу Ефес, додека кај Жалгирис најрасположен за игра беше Карсен Едвардс кој даде 16 поени.

Екипата на Бешикташ дојде до триумф од 95:87 и ја запиша третата победа сезонава.

Кошаркарите на Бешикташ одиграа неверојатно прво полувреме кое го добија со 53:35 и со кое ги решија дилемите околу победникот. Предноста се зголеми на 25 поени стартот од третата четвртина (60:35), по што следеше опуштање во играта кое го искористија гостите за да избегнат катастрофа .

Џејлен Ноуел со 21 поен и Скоти Вилбекин со 20 поени беа најдобри кај Бешикташ, додека во редовите на Баерн, Владимир Лучиќ со 17 поени беше најпрецизен.